Sel fəlakətinin miqyası böyüyür – Nepaldan yeni rəqəmlər
Nepalda baş verən dağıdıcı sel nəticəsində ölənlərin sayı artmaqda davam edir. Yerli medianın yaydığı məlumata görə, şənbə səhərinə olan son rəqəmlərdə 616 nəfərin öldüyü bildirilir.
Nepal polisinin məlumatına əsasən, bundan əvvəl 538 nəfərin öldüyü açıqlanmışdı. 2 301 nəfər xilas edilib və tibbi yardım alır.
Nepal və Çin sərhədinin hər iki tərəfində ümumilikdə təxminən 2,5 min insanın hələ də itkin düşdüyü bildirilir.
Nepal Turizm Şurasının avqustun 28-i axşam saatlarına olan məlumatına görə, 121 xarici turist xilas edilib. Onlardan ikisinin Rusiya vətəndaşı olduğu qeyd olunur.
Ümumilikdə siyahıda 36 ölkədən 743 turistin adı yer alır. Onlardan 622 nəfərin harada olduğu hələ müəyyənləşdirilməyib.
Çinin Tibet bölgəsində də vəziyyət ağır olaraq qalır. “Sinxua” agentliyinin yerli fövqəladə hallar qurumuna istinadən yaydığı məlumata görə, Tibet tərəfində 7 nəfər ölüb, 554 nəfər isə itkin düşmüş hesab olunur.
Axtarış-xilasetmə işləri davam etdirilir. Son beynəlxalq məlumatlarda da Nepal-Çin sərhədində selin miqyasının böyüdüyü və itkinlərin sayının minlərlə olduğu bildirilir.
