Müqəddəs ziyarətə getmişdilər: yüzlərlə insan daşqında itkin düşdü
Nepal və Çin sərhədində baş verən güclü daşqın nəticəsində yüzlərlə insan həyatını itirib, 1400-dən çox şəxsin taleyi isə naməlum olaraq qalır. İtkinlər arasında çoxsaylı xarici turist və zəvvarlar var.
Associated Press-in son məlumatlarında ölənlərin sayının yüzlərlə olduğu, itkinlərin sayının isə 1000-i keçdiyi bildirilir. Fəlakətə Himalayda buzlaqın çökməsinin səbəb olduğu ehtimal edilir.
İtkin düşənlərin böyük hissəsi Tibetdə yerləşən müqəddəs Kailaş dağına ziyarətə gedən şəxslər və turistlərdir. Kailaş dağı hinduizm, buddizm, caynizm və Tibet Bon ənənəsinin davamçıları üçün müqəddəs hesab olunur.
Müxtəlif məlumatlara görə, itkinlər arasında Nepal, Çin, ABŞ, Hindistan, Rusiya, Böyük Britaniya, Avstraliya, Kanada, Cənubi Koreya, Yaponiya və bir sıra digər ölkələrin vətəndaşları var.
Təkcə ABŞ-dan təxminən 90 nəfərlə əlaqə yaratmaq mümkün olmayıb. ABŞ Dövlət Departamenti üç amerikalının xilas edildiyini və hələlik ABŞ vətəndaşları arasında ölüm faktının təsdiqlənmədiyini bildirib.
Fəlakət bölgəsində axtarış-xilasetmə əməliyyatları davam edir.
