“Qatil arılar” hücuma keçdi - Polis və yanğınsöndürənlər belə xilas ola bilmədi

ABŞ-ın Morensi şəhərində yeddi nəfər, o cümlədən polis əməkdaşları və yanğınsöndürənlər “qatil arılar” kimi tanınan Afrika arılarının hücumuna məruz qalıb. Bu barədə EA Courier məlumat yayıb.

İlk olaraq iki təsadüfi şəxs arı sürüsünün hücumuna məruz qalıb. Hadisə yerinə gələn polis əməkdaşları avtomobildən düşən kimi arılar onların üzərinə hücum edib. Buna baxmayaraq, polis əməkdaşları zərərçəkənlərdən birini patrul avtomobilinə mindirə bilib.

Digər zərərçəkən isə yol kənarında bükülmüş vəziyyətdə dayanıb, danışa bilməyib və ağzından köpük axıb. Onu götürmək üçün hadisə yerinə gələn yanğınsöndürənlər də hücuma məruz qalıb.

Zərərçəkəni yüz minlərlə qəzəbli arıdan ibarət hərəkət edən qara bulud əhatəyə almışdı.

Yanğınsöndürənlərin sözlərinə görə, arılar qoruyucu geyimlərə baxmayaraq onların baş nahiyəsindən sancmağı bacarıb.

Zərərçəkənlər xəstəxanaya çatdırılıb. Onlardan birini içəri aparmazdan əvvəl xilasedicilər onun üzərindəki arıları əl ilə təmizləmək məcburiyyətində qalıb — o, başdan ayağa arılarla örtülmüş vəziyyətdə idi.

Hadisə nəticəsində iki polis əməkdaşı və üç yanğınsöndürən xəsarət alıb. Ertəsi gün hadisə yerinə qayıdan briqada rəhbəri Rik Varela pətəyin izinə rast gəlməyib və bunun köç edən arı sürüsü olduğunu ehtimal edib.

Qeyd olunur ki, Afrika arıları adətən may–iyun aylarında aktivləşir. Lakin bu il Arizonada qışın isti keçməsi səbəbindən arılar çoxalmağa davam edib və pətəklər dolub-daşıb.

DenMedia.az