Qəzzada apokaliptik mənzərə: güclü qum fırtınası səmanı qan rənginə boyadı - FOTO

Qəzza zolağının cənubu qorxunc qırmızı işığa bürünüb: bölgə üzərində güclü qum fırtınası hökm sürür və gün işığını qan rənginə çalan qırmızı dumanla əvəz edir.

Şənbə günü Qəzza zolağında güclü toz fırtınası baş verib. Yerli hakimiyyət orqanları sakinləri təhlükəsizlik tədbirləri görməyə çağırıblar.

HƏMAS-ın nəzarətində olan Daxili İşlər Nazirliyinə tabe fövqəladə xidmətlər fələstinlilərə, xüsusilə də tənəffüs yolları xəstəliklərindən əziyyət çəkən insanlara qalın, narıncı çalarlı toz buludu bölgəni bürüdüyü müddətdə evdə qalmağı tövsiyə edib.

Xidmətlər həmçinin güclü küləyin onları aparmaması üçün çadırların möhkəmləndirilməsini istəyiblər. Şənbə günü yayılan videolarda çadırların güclü küləkdə dalğalandığı, ağacların yelləndiyi və avtomobillərin demək olar ki, sıfıra enmiş görünüş şəraitində tozlu küçələrdə hərəkət etdiyi görünür.

Qəzzada toz və qum fırtınaları baş versə də, hazırkı qədər güclüsü son beş ildə müşahidə olunmamışdı.

İsraillə HƏMAS arasında davam edən müharibə səbəbindən Qəzzanın iki milyondan çox sakininin əksəriyyəti evlərini tərk etmək məcburiyyətində qalıb və hazırda çadırlarda və zədələnmiş binalarda yaşayır.

DenMedia.az