Təmir zamanı ağır hadisə: Lənkəran sakini avtobusun altında qaldı - VİDEO

Lənkəran rayonunun Velədi kəndində vətəndaş köməksiz vəziyyətdə qalıb.

DenMedia.az xəbər verir ki, bu barədə Fövqəladə Hallar Nazirliyi (FHN) məlumat yayıb.

Bildirilib ki, məlumatla əlaqədar dərhal FHN-in Cənub Regional Mərkəzinin xilasediciləri əraziyə cəlb olunublar.

Hadisə yerində əməliyyat şəraiti qiymətləndirilərkən müəyyən olunub ki, vətəndaş - 1970-ci il təvəllüdlü Taleh Abidin oğlu Məhərrəmov "İsuzu" markalı avtobusun təmiri zamanı nəqliyyat vasitəsinin dayaqdan sürüşməsi nəticəsində nəqliyyat vasitəsinin altında köməksiz vəziyyətdə qalıb.

Xilasedicilər tərəfindən xüsusi xilasetmə vasitələrinin tətbiqi ilə T.Məhərrəmov avtobusun altından çıxarılaraq xilas edilib.