Bakıda daha bir yol çökdü: Binəqədi rayonunda iri kollektor xətti sıradan çıxdı-FOTOLAR

Bakıda yol infrastrukturu ilə bağlı növbəti təhlükəli hadisə qeydə alınıb.

Denmedia.az xəbər verir ki, bu dəfə yol çöküntüsü Binəqədi rayonunun Babək küçəsində baş verib.

 İlkin məlumatlara görə, hadisəyə səbəb diametri 1000 mm olan dəmir-beton boru xəttinin çökməsi olub.

Məlumata əsasən, sözügedən boru xətti 1984–1986-cı illərdə inşa edilib və Xırdalanla Biləcəri ərazisinin əhəmiyyətli hissəsinə xidmət edən əsas gətirici kollektor hesab olunur. Uzun illər istismar olunan kollektor artıq texniki baxımdan yararsız vəziyyətə düşüb və istismar müddətini başa vurub. Nəticədə boru xəttində yaranan çökmə yol örtüyünün də dağılmasına səbəb olub.

Hadisə ərazidə yaşayan sakinlər arasında ciddi narahatlıq yaradıb. Sakinlər bildirirlər ki, son vaxtlar bu ərazidə torpaqaltı kommunikasiya xətlərinin köhnəlməsi səbəbindən risk artıb. Onların sözlərinə görə, yolun çökməsi həm nəqliyyatın hərəkətinə maneə yaradır, həm də qəza təhlükəsini artırır.

Baş verən hadisə ilə əlaqədar əraziyə aidiyyəti dövlət qurumlarının əməkdaşları cəlb olunub. Hazırda təhlükəsizlik tədbirləri görülür, ərazi mühasirəyə alınıb və nəqliyyatın hərəkətinə məhdudiyyətlər tətbiq edilib. Eyni zamanda kollektor xəttinin texniki vəziyyətinin qiymətləndirilməsi və bərpa işlərinin aparılması üçün müvafiq tədbirlərə başlanıldığı bildirilir.

Qeyd edək ki, paytaxtda son dövrlər köhnə mühəndis-kommunikasiya xətlərinin sıradan çıxması nəticəsində yol çökmələri tez-tez müşahidə olunur. Mütəxəssislər bu cür halların qarşısını almaq üçün istismar müddətini başa vurmuş kollektor və boru xətlərinin vaxtında yenilənməsinin vacibliyini vurğulayırlar.

Hadisə ilə bağlı araşdırmalar davam etdirilir. Aidiyyəti qurumlar problemin qısa müddətdə aradan qaldırılacağını və ərazidə normal hərəkətin bərpa olunacağını bildiriblər.

Ellada Rəsul

Denmedia.az