Serbiyada futbol matçında faciə: məşqçi oyun zamanı dünyasını dəyişdi

Serbiya çempionatında “Mladost” və “Radniçki 1923” komandaları arasında keçirilən futbol matçı zamanı faciə baş verib. Qonaq komandanın baş məşqçisi Mladen Jijoviç oyunun gedişində özünü pis hiss edib və az sonra dünyasını dəyişib.

DenMedia.az xəbər verir ki, bu barədə jurnalist Aleksandr İliç sosial şəbəkə X-də məlumat verib.

Hadisə görüşün 22-ci dəqiqəsində, hesab 2:0 qonaqların xeyrinə olarkən baş verib. Həkimlər dərhal müdaxilə etsələr də, məşqçini xilas etmək mümkün olmayıb. 44 yaşlı mütəxəssis xəstəxanaya aparılarkən yolda vəfat edib.

Tragik hadisə səbəbindən oyun dərhal dayandırılıb. Futbol ictimaiyyəti mərhumun ailəsinə və yaxınlarına dərin hüznlə başsağlığı verib.

Mladen Jijoviç futbol karyerasında həm oyunçu, həm də məşqçi kimi uğurlu yol keçib. O, 2025-ci ildə “Radniçki 1923” komandasının baş məşqçisi təyin olunmazdan əvvəl Bosniyanın “Zrinjski” və “Sloboda” klublarında, eləcə də Albaniyanın “Şkupi” komandasında çalışıb. Oyunçu kimi iki dəfə Bosniya və Herseqovina Kubokunun qalibi olub və milli komandanın heyətində iki oyun keçirib.