ABŞ İranı dəstəkləyən bütün ölkələri “hədəfə çevirəcəyini” bəyan etd
ABŞ İrana qarşı yeni iqtisadi təzyiq paketini Tehranla ticarət edən üçüncü ölkələrə və vasitəçilərə də tətbiq etməyə hazırdır.
ABŞ-nin maliyyə naziri Scott Bessent mətbuat konfransında bildirib ki, yeni məhdudiyyətlər yalnız İrana deyil, Tehranın əməliyyatlarına vasitəçilik edən, tranzaksiyaları asanlaşdıran və İran neftinin pula çevrilməsində iştirak edən bütün strukturlara şamil oluna bilər. Reuters-in məlumatına görə, Vaşinqton ikinci dərəcəli sanksiyaların əhatəsini genişləndirir, lakin bəzi ölkələrə və şirkətlərə münasibətdə dərhal cəza tətbiq etmək əvəzinə uyğunlaşmaq üçün vaxt verir.
Bessent xəbərdarlıq edib:
“Heç kim ABŞ sanksiyalarının əhatəsindən kənarda deyil. Tehranın tranzaksiyalarına kömək edən və İran neftini pula çevirən sistemin bir hissəsi olanlar hədəfə çevriləcəklər.”
ABŞ maliyyə naziri Vaşinqtonun sanksiyalardan yayınmaq cəhdlərinə sərt şəkildə qarşı çıxacağını vurğulayıb. Yeni tədbirlər rəqəmsal aktivlər, qızıl, aviasiya, texnologiya və gəmiçilik də daxil olmaqla bir sıra sahələri əhatə edir.
Bessent bu kampaniyanı İrana qarşı daha geniş iqtisadi təzyiq strategiyasının bir hissəsi kimi təqdim edib. ABŞ rəsmiləri bu mərhələni “iqtisadi D-Day” və qlobal maliyyə əlaqələrinə qarşı genişmiqyaslı hücum kimi xarakterizə edirlər.
