Ukraynanın Aİ-yə sürətli üzvlüyünə zərbə: Budapeşt bəndi blokladı

Macarıstanın Baş naziri Peter Madyar Avropa İttifaqı sammitinin ilk gününün yekun sənədindən Ukraynanın Aİ-yə sürətləndirilmiş üzvlüyü ilə bağlı bəndin çıxarılmasına nail olub. “Focus” jurnalının yazdığına görə, bu, Kiyev üçün geriyə addım kimi qiymətləndirilir.

Bu həftə Avropa İttifaqı Ukrayna və Moldova üçün genişlənmə prosesi üzrə altı klasterdən birincisini açıb. Bu klasterlər namizəd ölkələrin qanun və qaydalarını Aİ standartlarına uyğunlaşdırmalı olduqları siyasət sahələrini əhatə edir.

Layihə mətnində qalan danışıqlar qruplarının “mümkün qədər tez” açılmalı olduğu qeyd edilirdi. Lakin görüşdən sonra Madyar bildirib ki, sürətləndirilmiş üzvlüklə bağlı ifadə sənəddən “son anda” çıxarılıb.

“Focus”un mənbəsinin sözlərinə görə, Budapeşt Ukraynanın bütün qaydaları qəbul etməli olduğunu və heç bir xüsusi imtiyaz almayacağını aydın şəkildə göstərmək istəyib.

“Ukrayna üçün bu dəyişiklik hər halda geriyə addımdır. Danışıqların özü dəyişməsə də, Aİ bu ifadəni çıxarmaqla növbəti addımların tez başlanması ilə bağlı üzərindəki təzyiqi azaldır”, - deyə məqalədə bildirilib.

Macarıstan baş nazirinin fikrincə, Ukraynanın Aİ-yə üzvlüyü 10-15 il çəkə bilər. “Politico”nun məlumatına görə isə Brüssel bu prosesin 2027-ci ilə qədər irəliləməsinə ümid edir.

Denmedia.az