İran XİN başçısı: Rejim dəyişikliyi boş illüziyadır
saida
İranın xarici işlər naziri Abbas Araqçi ölkəsində rejim dəyişikliyi perspektivlərini “boş illüziya” adlandırıb. O, CNN Türk-ə müsahibəsində bildirib ki, İranın siyasi sistemi dərin köklərə və möhkəm bazaya malikdir, ayrı-ayrı şəxslərin gəlişi və gedişi sistemi dəyişmir:
“Rejimin dəyişəcəyi fikri sadəcə boş xülyadır. Bəzi insanlar buna inanır. Amma sistem o qədər möhkəmdir ki, hər şey əvvəlki kimi işləməyə davam edir”.
Nazir ölkədəki etirazlar və ölənlərin sayı ilə bağlı xarici, qeyri-iran mənbələrinin yaydığı rəqəmləri yalan adlandırıb. Onun sözlərinə görə, 30–50 min ölüm barədə iddialar həqiqəti əks etdirmir və rəsmi məlumatlara əsasən, həlak olanların sayı 3 117 nəfərdir.
Araqçi etirazçılarla terrorçu və vandal qrupların bir-birindən ayırd edilməsinin vacibliyini vurğulayıb. Bildirib ki, 28 dekabr – 8 yanvar tarixlərində iqtisadi çətinliklər və valyuta məzənnəsi ilə bağlı narazılıqlardan doğan dinc və məntiqli etirazlar müşahidə olunub. Lakin 8–10 yanvar aralığında vəziyyət dəyişib: silahlı toqquşmalar başlayıb, təhlükəsizlik qüvvələrinə və mülki şəxslərə hücumlar edilib.
Nazirin sözlərinə görə, bu eskalasiyada Donald Trampın İran xalqına müraciətindən sonra yaranan atmosferdən də sui-istifadə edilib — məqsəd itkilərin sayını artırmaq və xarici dəstək qazanmaq olub.
Araqçi əlavə edib ki, rəsmi ölənlərin ümumi sayının təxminən 2 mini təhlükəsizlik qüvvələrinin əməkdaşlarıdır. İran qanunvericiliyinə uyğun olaraq, onlar “şəhid” sayılır və ailələrinə dövlət dəstəyi göstəriləcək; adları rəsmi qurumlar tərəfindən açıqlanacaq.
