Makron Rusiyaya görə təşvişdə: “Hazır olmalıyıq” dedi, region qarışdı

Fransa Prezidenti Emmanuel Makronun son paylaşımı ölkədə ciddi narahatlıq doğurub. Makron Fransanın hibrid müharibəyə hazır olmalı olduğunu bildirib.

O, Rusiyanın hücum ehtimalını real hesab etmədiyini, lakin təhlükənin olduğunu söyləyib. Bu səbəbdən, xalqı hibrid müharibəyə hazır olmağa çağırıb.

DenMedia.az xəbər verir ki, bu barədə Globalindoya danışan siyasi şərhçi Kənan Novruzov Rusiya–Ukrayna müharibəsinin artıq yeni mərhələyə keçdiyini bildirib:

“ABŞ-da Prezident Donald Tramp təkrar hakimiyyətə gəldikdən sonra “kollektiv Qərb” anlayışı əvvəlki çəkisini itirib. Çünki ABŞ və Avropanın Ukrayna müharibəsi ilə bağlı yanaşmaları fərqlidir. Vaşinqton savaşın bitməsini istəyir. Bəs, niyə?

Birincisi, ABŞ Rusiya ilə münasibətlərin daha da kəskinləşməsinin tərəfdarı deyil. Əksinə, Moskva ilə müəyyən iqtisadi əməkdaşlığa maraq göstərir.

İkincisi, Vaşinqton müharibədən sonra diqqətini Yaxın Şərqə və Çinə yönəltmək niyyətindədir.

Üçüncüsü, ABŞ savaş bitdikdən sonra Ukraynaya böyük həcmdə investisiya yatırmaq üçün səbirsizlənir.

Avropa isə əksinə, müharibənin dayanmasından narahatdır. Çünki savaş bitərsə, Rusiyanın növbəti hədəfinin hansısa Avropa ölkəsi olacağı ehtimalı güclənir. Rusiyada ictimai narazılıq artıb, iqtisadi vəziyyət ağırlaşıb. Müharibə davam etdikcə bu narazılıq hakimiyyətə yönəlmir. Lakin qarşıdurma dayanarsa, daxili etirazlar arta, Kremlin diqqəti isə yenidən xarici avantüralara yönələ bilər. Bundan əlavə, Avropa hazırda Rusiyadan ucuz enerji alır və müharibədən sonra bu imtiyazın itəcəyi ehtimalı var”.

K.Novruzovun sözlərinə görə, Rusiya–Ukrayna müharibəsi ABŞ ilə Avropa arasında strateji rəqabət mövzusuna çevrilib:

“ABŞ müharibəni bitirməyə çalışdıqca Avropa daha aqressiv mövqe sərgiləyir və Kiyevi silahlandırır. Ukrayna isə həm Avropa, həm də ABŞ-dan imtina edə bilmədiyi üçün çıxılmaz vəziyyətə düşüb.

Elə bir mərhələ yaranıb ki, Kiyev ya Vaşinqtonun, ya da Avropa paytaxtlarının dəstəyindən birini seçməli olacaq. Əgər Brüssel Şərqi Avropada sülhə bir addım qaldığını görərsə, məqsədli şəkildə təxribata gedib Rusiyanı daha böyük müharibəyə cəlb edə bilər. Fransa Prezidenti Emmanuel Makronun hibrid müharibə haqda açıqlaması da bu kontekstdə qiymətləndirilməlidir. Ümumilikdə, ayrı-ayrı Avropa dövlətlərinin böyük müharibəyə hazırlaşdığına dair ciddi siqnallar mövcuddur.

Avropa belə bir təxribat yoluna əl atsa, ABŞ-la münasibətlər gərginləşəcək. Bu isə həm NATO-nun parçalanmasına, həm də Üçüncü Dünya müharibəsinə aparan prosesi sürətləndirər”.