Cəlaloğlu bacısı oğlunun həbsindən danışdı: “Xəbərdarlıq edilmişdi”

“Hürriyət” qəzetinin və “Hürriyyət TV”nin ofisində əməliyyat aparılması ilə bağlı məhkəmə qərarından məlum olur ki, Vüqar Məmmədovun rəhbərlik etdiyi televiziyadakı çıxışları sosial gərginliyi artırmağa və  dövlət orqanlarını gözdən salmaqla nəticələnən məqsədlər kimi dəyərləndirilib”.

Denmedia.az “ Azərbaycan Reallığı”na istinadla xəbər verir ki, bunu açıqlamasında Azərbaycan Demokrat Partiyasının (ADP) sədri Sərdar Cəlaloğlu bacısı oğlu, “Hürriyət” qəzetinin və “Hürriyyət TV”nin rəhbəri Vüqar Məmmədovun saxlanılması ilə bağlı danışarkən deyib.

O qeyd edib ki, Dövlət Təhlükəsizliyi Xidmətinin (DTX) əməkdaşları adıçəkilən media qurumlarının ofisləri ilə yanaşı V.Məmmədovun evində də axtarış aparıblar:

“Evində axtarış zamanı heç nə götürməyiblər. DTX əməkdaşları özlərini çox mədəni aparıblar. Vüqarın ailə üzvlərinə qarşı psixoloji və fiziki təzyiq göstərilməyib. Ailə üzvləri bildirib ki, onlar üzr istəyərək bu prosesi həyata keçiriblər. Hətta Vüqarı həbs edəndə qandallayıblar, özünü pis hiss etdiyinə görə sonra açıblar. Çünki onun ürəyində problemlər var”.

S.Cəlaloğlu bildirib ki, bacısı oğlunun həbsinin  Prezident Administrasiyasının keçmiş rəhbəri, akademik Ramiz Mehdiyevin işi ilə əlaqəsi yoxdur:

“Bunun heç bir əsası yoxdur. Çünki Vüqar bəyin fəaliyyəti ilə bağlı iradlar 6 ay bundan əvvəl mənə çatdırılıb. Bu iradları həm Prezident Administrasiyası, həm də DTX tutub. Mən də dəfələrlə çalışmışam ki, Vüqar Məmmədov çıxışlarında radikal olmasın, irad tutulan məsələlərə yer verməsin. Sadəcə olaraq, Vüqar gərgin vəziyyətdədir. Fikirlərini radikal formada bildirirdi. Vüqarın valideynləri belə həmin çıxışlarına görə ona dəfələrlə iradlarını söyləyiblər. Ağır iqtisadi-sosial vəziyyətə düşən adamları görüb, özündən asılı olmayaraq emosional reaksiyalar verirdi. Ramiz Mehdiyevlə bu məsələni əlaqələndirmək böhtandan başqa birşey deyil. Həmin şəxsin vaxtında Vüqar Azərbaycan Demokrat Partiyasını maliyyələşdirmək ittihamı ilə 4 il həbs edilib. Biznes fəaliyyətinə də müəyyən əngəllər törətməyə çalışıblar, müflis olub. Bizə qarşı Ramiz Mehdiyevdən çox düşmənlik edən yoxdur. Vüqar onun komandasında necə ola bilər ki, Ramiz Mehdiyevin ən çox düşmənlik etdiyi şəxslər biz olmuşuq”.

ADP sədrinin sözlərinə görə, hələlik Vüqar Məmmədovun haqqında həbs qətimkan tədbiri seçilməyib: “Sadəcə olaraq, Səbail Rayon Məhkəməsi DTX-nın müraciəti əsasında onun ofis və evində axtarışla bağlı qərar qəbul edib. Hər hansı bir ittiham irəli sürülməyib. Çıxışlarına görə özü və ailəsinin 6 ay müşahidə altında saxlanılması ilə bağlı qərar qəbul edilib. Vüqar Məmmədovla bərabər Mahir Rüstəmlini də saxlamışdılar. Mahir sərbəst buraxılıb”. Globalinfo.az