Bakı və Ankaranın qərarı Tehranı təşvişə saldı – Pezeşkiana pis xəbər

Türkiyənin Qars-Naxçıvan dəmir yolu layihəsinə rəsmi start verməsi regionda yeni geosiyasi dinamika yaradıb. 224 kilometrlik xətt Türkiyəni birbaşa Azərbaycanla birləşdirməklə yanaşı, İranın tranzit maraqlarını da gündəmə gətirib.

Tehranın “Armanmeli” qəzeti layihəni “İrandan yan keçmək cəhdi” kimi dəyərləndirərək, bunun ABŞ-ın vasitəçiliyi ilə davam edən sülh prosesinə təsir göstərə biləcəyini yazıb.

Qars–Naxçıvan dəmir yolu regionda güc balansını necə dəyişə bilər və bu prosesdə İran hansı strategiyanı seçəcək? Layihənin Azərbaycan-Ermənistan sülh danışıqları fonunda başladılması hansı mesajı verir?

DenMedia.az xəbər verir ki, bu barədə danışan politoloq Xəqani Cəfərli deyib ki, layihənin inşası ilə bağlı İranın heç bir etirazı ola bilməz:

“Həmin dəmir yolunun çəkilməsi Türkiyə və Azərbaycanın suverinliyinə aid məsələdir. İranın buna etirazı Ankara və Bakının suverinliyini məhdudlaşdırmaq cəhdi kimi başa düşülə bilər. Tehran belə hərəkətlərdən çəkinməlidir. Çünki bu, Prezident Məsud Pezeşkianın İranın Türkiyə və Azərbaycanla münasibətlərinin normallaşması istiqamətində cəhdlərinə zərbə vurmaqdır. Tehranda buna cəhd edən qüvvələr anlamalıdırlar ki, ABŞ-ın vasitəçiliyi ilə irəliləyən Azərbaycan -Ermənistan sülh prosesinə, eyni zamanda “Beynəlxalq Sülh və Rifah üçün Tramp Yolu”na maneə olmaq cəhdləri ilk olaraq öz ölkələrinə zərər verəcək”.

Xəqani Cəfərli

Politoloqun sözlərinə görə, İran da Rusiya kimi Cənubi Qafqazda baş verən geosiyasi dəyişikliklərlə barışmaq məcburiyyətindədir:

“Ümumilikdə Moskva və Tehran hərbi-siyasi uğursuzluqlarının nəticəsi olaraq, həm qlobal, həm də regional məsələlərdə əvvəlki kimi söz sahibi olmadıqlarını anlayıblar. Buna görə də onlara təklif edilən mövqe ilə razılaşmaqdan başqa yolları yoxdur, əks halda, heç nə əldə edə bilməyəcəklər.

Qars–Naxçıvan dəmir yolu “Beynəlxalq Sülh və Rifah üçün Tramp Yolu”nun davamı hesab olunur. Bu layihə bölgənin siyasi, iqtisadi və nəqliyyat mənzərəsinə əhəmiyyətli təsir göstərəcək”. Globalinfo.az