Moskvanın planı pozuldu, yalanı ifşa edildi: Ruslar üçün gerisayım başlayır

Payız-qış ayları yaxınlaşdıqca Ukrayna münaqişəsinin taleyi narahatlıq doğurur. Döyüşlərin davam etdiyi müddətdə Kiyev və Moskvanın bu fəsillərdə çətinliklərlə üzləşəcəyi, hava şəraitinə görə hücum imkanlarının məhdudlaşacağı, hətta müharibənin bitəcəyi barədə fikirlər səsləndirilirdi. Bu il də oxşar düşüncələr xüsusilə Ukrayna üçün gündəmdədir.

Müharibənin yaxın aylarda bitməsi nə dərəcədə mümkün görünür? Əlverişsiz hava şəraiti səbəbindən tərəflər atəşkəs razılaşmasına gedə bilərmi?

DenMedia.az xəbər verir ki, bu barədə Globalinfoya-a danışan politoloq Oqtay Qasımov deyib ki, qış aylarında hərbi əməliyyatların aparılması spesifik çətinliklərlə müşayiət olunur:

“Bu, hava şəraiti və iqlimlə bağlı problemlərdən, havanın temperaturundan, hərəkətin çətinliyindən, qaranlıq dövrün uzunluğundan və s. ibarətdir. Qeyd olunan amillər hərbi əməliyyatların gedişatına ciddi təsir göstərir. Digər tərəfdən, Rusiya ordusunun yay aylarında həyata keçirdiyi hücumlar uğursuzluqla nəticələndi. Moskva planlaşdırırdı ki, bu müddət ərzində Ukraynanın xüsusilə Donbass, Donetsk və Zaparojye vilayətlərində hələ işğal etmədiyi ərazilərin böyük hissəsini ələ keçirərək məqsədlərinə çatacaq. Lakin bu, baş vermədi.

Ukrayna ordusu Rusiyanın hücumlarını böyük ölçüdə dəf edə bilsə də, onun potensialı sonsuz deyil və kifayət qədər həssas vəziyyətdədir. Kiyev hazırda Qərbin verdiyi dəstəkdən çox asılıdır. Yaxın aylarda atəşkəsin baş tutması real görünmür. Bu, iki ölkənin daxili iradəsindən daha çox, onları dəstəkləyən güclərin qərarlarına bağlıdır”.

Oqtay Qasımov

Politoloq bildirib ki, Rusiya Ukraynada hədəflərinə çatmadan müharibəni dayandırmaq istəmir:

“Bu, həm də Avropanın qlobal oyunçuya çevrilmək iddialarına qarşı duruşdur. Rusiyanı dolayısı ilə Çin dəstəkləyir və onun məğlubiyyətini istəmir. Avropa ölkələri də ABŞ-ın dəstəyi ilə Ukraynanı müdafiə edir, onun müqavimət gücünü artırmağa çalışırlar.

Müharibə başladıqdan bir il sonra gərgin bir mərhələyə daxil oldu. Son bir ildə Rusiya ordusunun ciddi cəhdlərinə və verdiyi itkilərə baxmayaraq, Kreml yalnız Ukrayna ərazilərinin təxminən 1 faizini işğal edə bilib. Rusiya Silahlı Qüvvələrinin Baş Qərargah rəisi Valeri Gerasimov da bunu təsdiqləyib. Gerasimov bildirib ki, mart ayından bu yana işğal olunan ərazi təxminən 3500 kvadrat kilometrdir, lakin sonradan açıqlanan məlumatların şişirdildiyi məlum oldu. Əgər 7 ay ərzində Rusiya yalnız bu qədər ərazi işğal edə bilibsə, digər torpaqları ələ keçirmək üçün uzun vaxt lazım olacaq. Tərəflər hücumlara davam edir, nəticə olaraq müharibənin uzanması qaçılmazdır”.