Tramp insan alverinə qarşı mübarizə üzrə yeni səfir təyin etdi
ABŞ Prezidenti Donald Trampın administrasiyası Barbera Tornhilli Dövlət Departamentinin İnsan Alverinə Qarşı Mübarizə və Monitorinq İdarəsinin rəhbəri və xüsusi tapşırıqlar üzrə səfir vəzifəsinə təyin etdi.
Tornhill bu vəzifədə insan alverinin qarşısının alınması, qurbanların müdafiəsi və cinayətkarların məsuliyyətə cəlb olunması istiqamətində beynəlxalq əməkdaşlığın koordinasiyası ilə məşğul olacaq.
ABŞ Senatının rəsmi məlumatlarına görə, Tramp administrasiyası Tornhillin namizədliyini 2026-cı il mayın 11-də Senata təqdim etdi.
İyunun 25-də o, Senatın Xarici Əlaqələr Komitəsində keçirilən dinləmələrdə iştirak etdi. İyulun 22-də komitə onun namizədliyini 9 əleyhinə, 12 lehinə səslə dəstəklədi.
Avqustun 7-də isə Senat 47 əleyhinə, 51 lehinə səslə Tornhillin təyinatını təsdiqlədi.
Onun rəhbərlik edəcəyi idarə ABŞ Dövlət Departamentinin hər il dərc etdiyi İnsan Alveri üzrə Hesabatın hazırlanmasında da mühüm rol oynayır.
Hesabatda müxtəlif ölkələrin məcburi əmək, cinsi istismar və insan alverinin digər formalarına qarşı mübarizəsi qiymətləndirilir. Eyni zamanda, qurbanların müdafiəsi, cinayətkarların mühakimə olunması və bu cür cinayətlərin qarşısının alınması istiqamətində görülən tədbirlər araşdırılır.
Bu qiymətləndirmələr ABŞ-nin digər ölkələrlə insan alverinə qarşı mübarizə sahəsində apardığı diplomatik əlaqələrdə mühüm vasitə kimi istifadə olunur.
İnsan Alverinə Qarşı Mübarizə və Monitorinq İdarəsi xarici hökumətlər, beynəlxalq təşkilatlar, qeyri-hökumət təşkilatları və insan alverindən zərər çəkən şəxslərlə əməkdaşlıq edir.
Tornhillin yeni vəzifəsi təkcə ABŞ daxilində deyil, dünya miqyasında insan alverinə qarşı mübarizə üzrə diplomatik təşəbbüsləri də əhatə edir.
