“Yağış çürüməsi” insanlara keçdi? Avropada yoluxma halları qeydə alındı
Avropanın bir sıra ölkələrində cinsi yolla ötürülə bildiyi bildirilən və “yağış çürüməsi” (“rain rot”) kimi tanınan nadir bakterial infeksiya halları aşkarlanıb. Daha əvvəl xəstəlik əsasən heyvanlarda qeydə alınırdı.
Daily Mail nəşrinin məlumatına görə, 2026-cı ilin ortalarınadək yoluxma halları Böyük Britaniya, Fransa, Almaniya, İspaniya və digər Avropa ölkələrində qeydə alınıb.
İnfeksiya özünü əsasən dəri əlamətləri ilə göstərir. Xəstələrdə səpkilər, irinli qabarcıqlar və qabıqlanma yarana bilər. Dəri dəyişikliklərinin qasıq nahiyəsi ilə yanaşı, üz, bədən, qol və ayaqlarda da meydana çıxa biləcəyi bildirilir.
Məlumata görə, xəstəlik əksər hallarda antibiotiklərlə uğurla müalicə olunur və ciddi ağırlaşmalara səbəb olmur.
Mütəxəssislər yoluxma hallarındakı artımın bakteriyanın yayılma yollarının dəyişməsi ilə əlaqəli ola biləcəyini ehtimal edirlər. Həkimlər qeyri-adi dermatoloji simptomları olan şəxslərin müayinəsi zamanı bu infeksiyanın da nəzərə alınmasını tövsiyə edirlər.
