Latviyada yay düşərgələrinin mövzusu dəyişdi: Şagirdlər dron idarə etməyi öyrənir - FOTO
Latviyada məktəblilər yay düşərgələri çərçivəsində dronların idarə olunması, aeronaviqasiya, meteorologiya və NATO standartları üzrə hazırlıq keçirlər.
Latviyanın Gənc Mühafizə Mərkəzinin məlumatına görə, gənclərin yüksək marağı nəzərə alınaraq 2026-cı ilin yayında ümumilikdə 12 düşərgə növbəsi təşkil olunub.
Onlardan biri 11–20 avqust tarixlərində Kuldiga bölgəsinin Nīkrāce ərazisində keçirilib. Düşərgənin əsas məqsədi şagirdlərə pilotsuz uçuş aparatlarının idarə olunması ilə bağlı həm nəzəri, həm də praktiki biliklər vermək olub.
On günlük proqram çərçivəsində iştirakçılar aeronaviqasiya və meteorologiyanın əsaslarını, hava məkanının təsnifatını, milli və NATO-nun normativ sənədlərini, eləcə də maskalanmanın əsas prinsiplərini öyrəniblər.
Praktiki məşğələlər zamanı şagirdlər dronları əl ilə idarə etmək, müxtəlif uçuş manevrləri yerinə yetirmək, panoramik görüntülər çəkmək, şərti rəqib qruplarını axtarmaq və sabit obyektləri müşahidə etmək üzrə təlim keçiblər. Proqrama gizli mövqelərdən uçuşların həyata keçirilməsi, səngər qazılması və avadanlığın maskalanması da daxil edilib.
Düşərgələr dövlət orta məktəblərinin 10–12-ci sinif şagirdləri və texniki məktəblərin 1–3-cü kurs tələbələri üçün nəzərdə tutulub və dövlət müdafiəsi tədrisinin praktik hissəsi kimi təşkil edilir.
