ABŞ İranda nüvə obyektinə bunkerdağıdan bomba ilə zərbə endirdi
saida
The War Zone nəşrinin məlumatına görə, ABŞ hərbçiləri İrandakı nüvə obyektinə güclü bunkerdağıdan bomba ilə zərbə endirib. Jurnalistlər yeni peyk görüntülərini təhlil edərək Tehran yaxınlığındakı obyektin ciddi zədələndiyini müəyyən ediblər.
Söhbət Tehrandan 32 km cənub-şərqdə yerləşən Taleghan 2 hərbi kompleksindən gedir. Paylaşılan şəkillərdə beton sığınacaqda üç böyük kraterin əmələ gəldiyi görünür ki, bu da son hücumun izləri kimi qiymətləndirilir.
Məqalədə qeyd olunur ki, hücumdan bir neçə ay əvvəl obyekt beton örtüklə möhkəmləndirilmiş və əlavə torpaq qatları ilə qorunmuşdu. Ekspertlərin fikrincə, bu səbəbdən ABŞ dərin yeraltı sığınacaqları məhv edə bilən xüsusi güclü bombalardan istifadə etməyə məcbur qalıb.
Nəşrin ehtimalına görə, zərbə B-2 strateji bombardmançıları vasitəsilə GBU-57 bunkerdağıdan bombaları ilə endirilib. Bu bombalar ABŞ ordusunun arsenalındakı ən güclü qeyri-nüvə silahlarından biri sayılır və yeraltı hədəfləri məhv etmək üçün hazırlanıb.
