Gərginlik böyüyür: ABŞ İrana qarşı güc tətbiqinə yaxınlaşır

ABŞ-ın İrana qarşı hərbi zərbəsi yaxın 48 saat ərzində endirilə bilər. Bu barədə The New York Times Ağ Evdəki mənbələrə istinadən məlumat yayıb.

Nəşrin yazdığına görə, Vaşinqton Tehrana təzyiqləri kəskin şəkildə artırıb və nüvə proqramı üzrə danışıqların pozulacağı halda güc tətbiqini nəzərdən keçirir.

CNN isə dəqiqləşdirir ki, Donald Trampın ətrafında bir neçə ssenari müzakirə olunur — nüvə obyektlərinə dəqiq zərbələrdən tutmuş hərbi və hökumət infrastrukturlarına, eləcə də təhlükəsizlik blokunun nümayəndələrinə hücumlara qədər. Regionda artıq ABŞ-ın hərbi-dəniz qüvvələri və aviasiyası cəmləşdirilib ki, bu da birbaşa təzyiq elementi kimi qiymətləndirilir.

Eyni zamanda, KİV-lərin məlumatına görə, İran tərəfi vasitəçilər üzərindən dialoqa hazır olduğu barədə siqnallar verir, lakin hücum baş verərsə sərt cavab veriləcəyi barədə də xəbərdarlıq edir.

DenMedia.az