İran raket proqramı üzrə danışıqlardan imtina etdi
saida
İran öz adi silahları üzrə danışıqlar aparmaq niyyətində deyil; bu, o cümlədən raket proqramına da aiddir. Bu barədə Nyu-Yorkda jurnalistlərə İranın yüksək vəzifəli rəsmisi bildirib.
“Biz konvensional silahlarla, o cümlədən raketlərlə bağlı heç bir məsələ üzrə danışıqlar aparmayacağıq. Bu, risk edə bilməyəcəyimiz bir məsələdir”, — deyə o qeyd edib.
Rəsmi vurğulayıb ki, Tehran İranın Nüvə Silahlarının Yayılmaması Müqaviləsinin müddəalarına riayət etməklə dinc atomdan istifadə hüququnu təmin edən şərtlərin müzakirəsinə hazırdır. Bundan əlavə, danışıqların məqsədi “bir tərəfli sanksiyalar formasında terrorizmin dayandırılması” olmalıdır.
“Biz uğursuzluğa məhkum olan və yeni bir müharibə üçün növbəti bəhanə kimi istifadə edilə biləcək danışıqlara girmək istəmirik”, — deyə o əlavə edib.
