"Tramp Avropanı sülh prosesindən kənarda qoyur" - "Le Monde"

"Vaşinqtonun yeni xətti Ukrayna üçün riskləri artırır..."

Tramp administrasiyası Ukrayna üzrə sülh prosesini Avropanı oyundan çıxararaq aparır və bu, həm Kiyevdə, həm də Avropada ciddi narahatlıq doğurur.

DenMedia.az xəbər verir ki, bu barədə "Le Monde" nəşri yazıb.

ABŞ Avropanı danışıqlardan uzaqlaşdırır

Kreml müşaviri Dmitriyev bildirib ki, ABŞ-Rusiya arasında müzakirə olunan "sülh planı" Moskvaya uyğunlaşdırılıb və Cenevrədəki üçtərəfli görüşün nəticələri Vaşinqton tərəfindən faktiki nəzərə alınmayıb.

Ukrayna mənbələri deyir ki, ABŞ Rusiyanın tələblərinə uyğun bir sıra maddələri onlarla müzakirə edib və Kiyevdən tam məxfilik istəyib. Üstəlik, Tramp emissarları Brüsselə gəlmək əvəzinə Zelenskinin nümayəndələri ilə Floridada qapalı görüş keçiriblər.

Vaşinqton Rusiyaya təzyiqi azaldır, Avropa xəyanət təhlükəsini hiss edir

Tramp müharibədə kimin təcavüzkar, kimin qurban olduğuna əhəmiyyət vermir və Zelenskini "fevralda razılaşma bağlamadığına görə" tənqid edir. ABŞ həmçinin "Lukoyl"a qarşı sanksiyaların bir hissəsini dayandırıb, bu isə Rusiyaya maliyyə təzyiqini zəiflədir.

"Der Spiegel"in yayımladığı danışıqlarda Makronun ABŞ-ın "Ukraynanı ərazi məsələsində tək buraxa biləcəyini" deməsi Avropada şok yaradıb. Paris bunu təkzib etsə də, narahatlıq qalır.

Avropa liderləri həmçinin Uitkoff və Kuşnerin Rusiyaya biznes gözü ilə baxmasını təhlükəli sayır. Finlandiya prezidenti Stubb xəbərdar edir: "Ukraynanı bu şəxslərlə tək buraxmaq olmaz".

Avropanın təsir imkanları və yeni reallıq

"Le Monde" yazır ki, Avropa hələlik ABŞ-ın Rusiyanın prosesləri blokladığını başa düşməsini gözləməli olacaq. Bununla yanaşı, qitənin müəyyən təsir imkanları var: ABŞ Ukraynanın NATO və Avropa İttifaqı məsələsində təkbaşına qərar verə bilməz.

Bundan əlavə, Avropa 210 milyard avroluq Rusiya aktivlərini müsadirə etməklə Ukraynaya uzunmüddətli yardımın maliyyəsini təmin edə bilər, baxmayaraq ki, hüquqi maneələr çoxdur.

Bu arada ABŞ strategiyasındakı sərt anti-Avropa ritorikasının qitədə radikal sağ partiyalar tərəfindən alqışlanacağı gözlənilir. "Le Monde"a görə, Trampın Avropanı prosesdən sıxışdırması sülh mexanizmini daha da mürəkkəbləşdirir və Ukrayna üçün riskləri artırır.(Moderator.az)