Rusiya cəmiyyətində narazılıq artır: WhatsApp ətrafında mübahisə qızışır

Rusiyada messencerlərin fəaliyyətinə qoyulan qismən və ya tam məhdudiyyətlər fırıldaqçılıq problemini həll etməyib, əvəzində əhalinin əhval-ruhiyyəsinə mənfi təsir göstərib. WhatsApp-ın tam bloklanması ilə bağlı xəbərlər artıq cəmiyyətdə gərginlik yaradıb. Bu barədə 360.ru saytına Dövlət Dumasının informasiya siyasəti komitəsinin birinci sədr müavini Aleksandr Yuşenko bildirib. Onun sözlərinə görə, tam analoq təqdim olunmadan belə addımlar atmaq düzgün deyil.

Deputat qeyd edib ki, WhatsApp vasitəsilə video və mesaj göndərmək fırıldaqçılıq sxemlərində həlledici rol oynamır və bu prosesi “süni şəkildə belə həmin problemə bağlamaq mümkün deyil”. Yuşenko vurğulayıb ki, bu istiqamətdə görülən tədbirlərin çoxu lazımsız dərəcədə sərtdir.

Rus analoqu MAX-ın WhatsApp-ı əvəz etməsi ilə bağlı suala cavab olaraq, deputat bildirib ki, xidmətin inkişaf perspektivi olsa da, hazırda onun funksionallığı digər messencerlərlə müqayisədə xeyli zəifdir.

Parlamentariy deyib:

“Tam bloklama cəmiyyətdə gərginliyi daha da artıracaq. İnsanlar illərdir WhatsApp-dan istifadə edirlər. Bu narazılıq əvvəlkilərlə üst-üstə düşərək nə vaxtsa qaynama nöqtəsini keçəcək. Bu isə xalqın birliyini möhkəmləndirmə planına uyğun deyil.”

Xatırladaq ki, noyabrın sonunda Roskomnadzor bəyan etmişdi ki, WhatsApp Rusiya qanunvericiliyinin tələblərini yerinə yetirmədiyi təqdirdə ölkə ərazisində tam şəkildə bloklana bilər. Qurum bildirib ki, xidmətə ardıcıl şəkildə məhdudlaşdırıcı tədbirlər tətbiq olunur və bu, internet-kommunikasiya qaydalarının sistematik pozulması ilə əlaqədardır.

Denmedia.az