Politico: Mask Respublikaçıların gələcək liderini artıq müəyyən edib
saida
Milyarder İlon Mask ABŞ-da qarşıdakı 12 ilin siyasi taleyinin Donald Tramp və vitse-prezident Cey Di Vens koalisiyası ilə formalaşacağını bildirib. Politico-nun məlumatına görə, noyabrın sonunda Respublikaçılar Partiyasının üzvləri və məzunları üçün qapalı çıxışında Mask deyib ki, 2028-ci ildə Trampın ikinci müddəti başa çatdıqdan sonra ölkəni iki tam prezidentlik müddəti ərzində Vensin idarə edəcəyini gözləyir.
Maskın proqnozu Respublikaçı Partiya daxilində gələcək liderlik müzakirələrinin intensivləşdiyi dövrə təsadüf edir. Trampın ən yaxın siyasi tərəfdaşlarından biri olan Vens 2028-ci il üçün əsas namizəd sayılsa da, mövqeləri birmənalı deyil. Son sorğular göstərir ki, onun Donald Tramp-kiçik üzərindəki 20 ballıq üstünlüyü azalmağa başlayıb.
Bundan əlavə, hazırkı prezident Donald Tramp vaxtaşırı üçüncü müddətə namizəd ola biləcəyini söyləyir — halbuki ABŞ Konstitusiyasının 22-ci düzəlişi bunu qadağan edir. Siyasi analitiklər, o cümlədən Trampın bioqrafı Conatan Karl, bu bəyanatları siyasi təzyiq və “trolinq” taktikası kimi qiymətləndirirlər.
Vitse-prezident Vens isə öz siyasi ambisiyaları barədə açıq danışmır. Fox News-a verdiyi son müsahibəsində o:
“Hazırda vitse-prezident kimi vəzifələrimə fokuslanmışam. 2026-cı ilin aralıq seçkilərindən sonra gələcəyimlə bağlı Tramp ilə danışacağıq.”
Maskın bu açıqlaması onun Tramp ilə mürəkkəb və dəyişkən münasibətlərində yeni mərhələ sayılır. 2024-cü ildə Trampın kampaniyasına ən böyük şəxsi donor olduqdan sonra Mask administrasiyada baş müşavir postu aldı və Dövlət İdarəetməsinin Effektivliyi Departamentinə rəhbərlik etdi, lakin artıq 2025-ci ilin mayında Ağ Evi tərk etdi. Daha sonra o, Trampdan Ceffri Epşteyn işi üzrə sənədləri açıqlamağı tələb edən tənqidçilərə qoşuldu, amma son aylarda yenidən prezidentə yaxınlaşıb və X (Twitter) üzərindən ona dəstək nümayiş etdirir.
