saida
ABŞ prezidenti Donald Tramp Cənubi Koreyadan qayıdarkən jurnalistlərə bildirib ki, ölkənin 30 illik moratoriyadan sonra nüvə sınaqlarını bərpa etməsi məqsədəuyğundur, çünki digər ölkələr bu sınaqları artıq həyata keçirir.
DenMedia.az xəbər verir ki, bu barədə CNN məlumat yayıb.
“Bizdə hər kəsdən çox nüvə silahı var. Biz sınaqlar keçirmirik, amma başqaları keçirirsə, düşünürəm, bizim də bunu etməyimiz məqsədəuyğun olar,” — deyə Tramp bildirib.
“Görünür, onların hamısı nüvə sınaqları ilə məşğuldur.”
Prezident sınaqların harada və nə vaxt keçiriləcəyini dəqiqləşdirməyib, lakin qeyd edib:
“Bizim sınaq poliqonlarımız var. Bu barədə ayrıca açıqlama veriləcək.”
Eyni zamanda Tramp vurğulayıb ki, nüvəsizləşmə (denuklearizasiya) istədiyini bildirir:
“Biz bu məsələ ilə bağlı Rusiya ilə danışıqlar aparırıq və əgər hansısa addım atsak, bizə Çin də qoşulacaq.”
Daha əvvəl Tramp Truth Social sosial şəbəkəsində yazmışdı:
“Digər ölkələrin sınaq proqramlarına görə mən Müdafiə Nazirliyinə bizim nüvə silahlarımızın bərabər əsaslarla sınaqlarına başlamağı tapşırdım. Bu proses dərhal başlanacaq.”
Onun sözlərinə görə, Rusiya nüvə arsenalına görə dünyada ikinci, Çin isə üçüncü yerdədir, lakin “beş il ərzində Çin bu fərqi bağlayacaq.”
