Trampın Ukrayna ilə bağlı açıqlaması gündəm oldu: Bu ölkə hərəkətə keçdi

ABŞ Prezidenti Donald Tramp Rusiya ilə mümkün sülh nizamlanmasının bir hissəsi kimi Ukraynada təhlükəsizliyin təmin olunmasına Çin qoşunlarının cəlb edilməsini təklif edib.

DenMedia.az   xəbər verir ki, bu barədə “Financial Times” mənbələrə istinadən məlumat yayıb. Xəbərə görə, Tramp bu ideyanı Avropa liderləri və Ukrayna Prezidenti Volodimir Zelenski ilə görüşlərində müzakirə edib.

“Tramp Çini neytral zonaya nəzarət etmək üçün sülhməramlılarla təmin etməyi, Rusiya ilə sülh nizamlanmasının bir hissəsi kimi dəvət etməyi təklif edib”.

Lakin nəşr qeyd edir ki, Avropa ölkələri və Zelenski bu təşəbbüsə qarşı çıxıblar. Bununla yanaşı, Tramp administrasiyasının adı açıqlanmayan rəsmisi Çin sülhməramlıları ilə bağlı müzakirələrin aparıldığını təkzib edib.

Çin Xarici İşlər Nazirliyi də məsələyə münasibət bildirib və təhlükəsizlik zəmanəti olaraq öz qoşunlarını Ukraynaya göndərməyəcəyini açıqlayıb. Daha əvvəl Almaniyanın “Welt” qəzeti Pekinin yalnız BMT mandatı əsasında münaqişə zonasında sülhməramlılar yerləşdirməyə hazır ola biləcəyini yazmışdı.

Qeyd edək ki, Kiyev Çin hərbçilərinin Ukraynada olmasının qəti əleyhinədir, Moskva isə əksinə, münaqişənin həllində Pekinin iştirakına açıq olduğunu bəyan edib.(Globalinfo.az)