Müəmmalı oyuna start verildi: böyük dövlətlər arasında bölgü başlayır

ABŞ-ın vitse-prezidenti Ceyms Devid Vensin Ukrayna münaqişəsi ilə bağlı son açıqlaması dünya mediasında diqqət çəkib. Belə ki, o, problemin altı ay ərzində həll olunacağına ümid etdiyini bildirib.

Sitat: “Qan tökülməsinin qarşısını almaq üçün fəal şəkildə diplomatiya aparan prezidentimiz var. Bu, belə olmalıdır. Düşünürəm ki, amerikalılar bununla fəxr etməlidirlər. Nəticə nə olursa olsun, müharibə üç aya, ya da altı aya bitəcək, ümid edirik ki, daha çox olmayacaq”.

Denmedia.az  xəbər verir ki, Globalinfo.az-a danışan politoloq Yusif Bağırzadə deyib ki, Ukrayna və Rusiyanın sülh sazişi imzalaması hələ real görünmür:

“ABŞ-ın mövqeyi daha çox Rusiya ilə münasibətlərin normallaşdırılmasına yönəlir. Hazırda Vaşinqtonun açıqlamaları göstərir ki, onlar sanksiyaların sərtləşdirilməsində maraqlı deyillər. Moskva Kiyevə ağır şərtlər irəli sürür, o cümlədən NATO-ya üzvlük imkanını qəti şəkildə istisna edir. Digər tərəfdən, Böyük Britaniyanın təşəbbüsü ilə yaradılmış “Ukraynaya Könüllü Yardım İttifaqı”na artıq 30-a yaxın ölkə qoşulub. Onlardan təxminən 10-u müharibədə müəyyən irəliləyiş əldə olunacağı halda, Kiyevin təhlükəsizliyinə təminat verməyə hazır olduqlarını bildiriblər”.

Yusif Bağırzadə

Politoloq qeyd edib ki, böyük dövlətlər arasında öhdəliklərin bölgüsü məsələsi də müzakirə olunur:

“Türkiyə Qara dəniz bölgəsinin, Böyük Britaniya Ukraynanın qərb hissəsinin, Fransa və Almaniya isə Belarusla sərhəd zolağının təhlükəsizliyini təmin etməyə maraq göstərir. Eyni zamanda, NATO-ya qəbul olunmasa belə, Ukraynaya “beşinci maddə”yə bənzər təhlükəsizlik təminatının verilməsi variantı nəzərdən keçirilir. Kreml sülh sazişi imzalandıqdan sonra atəşkəsin elan olunmasını təklif edir. Kiyev isə əksinə, əvvəlcə 30-60 günlük atəşkəsin elan edilməsi, daha sonra danışıqların davam etdirilməsini istəyir. Yaxın bir-iki həftə ərzində Ukrayna və Rusiya liderlərinin Türkiyədə görüş ehtimalı var. Bununla yanaşı, ABŞ artıq Ukraynaya silah tədarükünü davam etdirir. İki müqavilə çərçivəsində 150 milyard dollarlıq hərbi yardım planlaşdırılır. Bunlara “Patriot” sistemləri və birgə dron istehsalı müəssisəsinin yaradılması daxildir. Faktiki olaraq, ABŞ müharibəni əsasən silah satışları üzərindən idarə edir”.