"Tramp bununla ABŞ-nin Cənubi Qafqaz və Mərkəzi Asiya regionlarında iştirakını artıracaq"

ABŞ prezidenti Donald Trampın dəstəyi ilə avqustun 8-də Ermənistan və Azərbaycan liderləri Ağ Evdə birgə bəyannamə imzalayıblar. Bu sənəd 40 ilə yaxın davam edən münaqişəyə son qoya bilər.

Denmedia.az  xəbər verir ki, bu barədə “Energy Intelligence” nəşri yazıb.

Nəşrin məlumatına görə, bu inkişaf region üçün böyük əhəmiyyət kəsb edir.

ABŞ-nin vasitəçiliyi ilə imzalanmış müqavilənin əsas hissəsi Azərbaycanı Naxçıvanla birləşdirən 43 km-lik dəhlizin 99 illik icarəsidir. Tramp marşrutuna dəmir yolu xətləri, kommunikasiya şəbəkələri və İranla sərhəd boyunca Ermənistanın cənubundan keçən neft və qaz kəmərləri də daxil ola bilər.

Yekun sülh sazişi hələ də siyasi maneələrlə üzləşir, lakin əsas nəqliyyat dəhlizlərinin inkişafı üçün zəmin yarada bilər.

ABŞ-ın Azərbaycandakı keçmiş səfiri Robert Sekuta bildirib ki, layihə Azərbaycanın neft və qazının Ermənistana tədarükünü təmin etməklə yanaşı, Ermənistanın Rusiyanın enerji təchizatındakı monopoliyasına alternativ yaradacaq.

“Lakin regionu həqiqətən dəyişdirəcək layihə uzun zamandır gözlənilən Transxəzər boru kəməri olacaq. Bu kəmər Türkmənistan qazını Azərbaycan vasitəsilə Avropaya çatdıracaq”, – Sekuta əlavə edib.

O həmçinin bildirib ki, Trampın addımı ABŞ-nin Cənubi Qafqaz və Mərkəzi Asiya regionlarında iştirakını artırmaq üçün mühümdür:

“Regional hadisələr Türkiyənin mövqeyini gücləndirdi. Azərbaycan və Ermənistan arasında davamlı sülh isə öz növbəsində Ermənistanla Türkiyə arasında münasibətlərin normallaşmasına gətirib çıxaracaq”.