“İdrak” liseyində atışma işi üzrə silah sahibi cinayət məsuliyyətinə cəlb edildi
saida
Bakıda “İdrak” liseyində müəllimə qarşı odlu silahla törədilən sui-qəsd hadisəsi ilə bağlı silahın sahibi də cinayət məsuliyyətinə cəlb olunub.
Bu barədə Baş Prokurorluğun Kriminalistika və informasiya texnologiyaları idarəsinin rəis müavini, kriminalistika şöbəsinin rəisi Orxan Rzayev qurumun Instagram səhifəsində keçirilən canlı yayım zamanı bildirib.
Onun sözlərinə görə, cinayət işi Bakı Ağır Cinayətlər Məhkəməsinə göndərilib. Silahın sahibi barəsində də cinayət təqibi həyata keçirilir. Bunun nəticələri barədə ictimaiyyətə əlavə məlumat veriləcək.
Xatırladaq ki, hadisə fevralın 6-da Bakının Binəqədi rayonunda yerləşən özəl “İdrak” liseyində baş verib. Baş Prokurorluğun məlumatına əsasən, hüquq-mühafizə orqanlarına şagirdin müəlliməyə atəş açaraq ona xəsarət yetirməsi barədə məlumat daxil olub.
Şübhəli şəxs saxlanılıb. Fevralın 7-də Binəqədi Rayon Məhkəməsinin qərarı ilə onun barəsində 4 ay müddətinə həbs qətimkan tədbiri seçilib.
Faktla bağlı Binəqədi Rayon Prokurorluğunda cinayət işi başlanıb. Şəxsə Azərbaycan Respublikası Cinayət Məcəlləsinin 29, 120.2.2-ci maddələri — xuliqanlıq niyyəti ilə adam öldürməyə cəhd üzrə ittiham irəli sürülüb.
