Türməyə düşən məşhur şou-biznes nümayəndələri – Qadın alveri, narkotik, bıçaqlanma…

Son illərdə Azərbaycan şou-biznes aləmində bir neçə tanınmış ifaçı və sənət adamı müxtəlif səbəblərlə həbs edilib. Onların arasında dələduzluq, narkotik vasitələrin dövriyyəsi, avtoxuliqanlıq və hətta ağır cinayətlərdə ittiham olunanlar var.

Bir çoxu qısa müddətlik inzibati cəza ilə azadlığa buraxılsa da, bəziləri uzunmüddətli həbsə məhkum edilib. Bu faktlar göstərir ki, şou-biznes nümayəndələri də digər vətəndaşlar kimi qanun qarşısında məsuliyyət daşıyırlar.

Denmedia.az belə sənət nümayəndələrindən bir neçəsini təqdim edir:

Müğənni Manaf Ağayev 18 fevral 2022-ci il tarixində işğaldan azad edilmiş Füzuli rayonuna icazəsiz səfər etdiyinə görə saxlanılıb və Yasamal Rayon Məhkəməsinin qərarı ilə barəsində 15 sutka inzibati həbs cəzası verilib.

Müğənni Rəqsanə İsmayılova 16 avqust 2025-ci il tarixində dələduzluq ittihamı ilə saxlanılıb. Ona qarşı Cinayət Məcəlləsinin 178.4-cü maddəsi (xüsusilə külli miqdarda dələduzluq) üzrə cinayət işi başlanılıb və məhkəmə qərarı ilə haqqında 4 ay müddətinə həbs qətimkan tədbiri seçilib.

Müğənni Fədayə Laçın 2017–2018-ci illərdə Bakı-Astara-Bakı xətti üzrə qatar vasitəsilə qaçan məhbuslara yardım etdiyi üçün təqsirli bilənərək həbs olunub. 5 illik cəza alıb, lakin müəyyən müddət sonra bu cəza 2 il azadlıqdan məhrum edilməyə endirilib, sənətçi 2019-cu ilin oktyabrında sərbəst buraxılıb.

“Eurovision-2008” təmsilçimiz Samir Cavadzadə 2011-ci ildə dostu Elvin Hüseynovu bıçaqlaması ilə əlaqədar saxlanılıb və bir müddət həbsdə qalıb.

Meyxanaçı Rəşad Dağlı (Əmirov) qonşusunu qəsdən öldürmək və soyuq silah saxlamaqda təqsirli bilinərək 9 il 6 ay azadlıqdan məhrum edilib və hazırda ciddi rejimli penitensiar müəssisədə cəza çəkir.

Müğənni Tunar Rəhmanoğlu 2013-cü ildə avtoxuliqanlıq və polisin qanuni tələbini yerinə yetirməkdən imtina etməsi səbəbindən 10 sutka həbs və 1 il sürücülük hüququndan məhrum edilmə cəzası alıb.

Reper Elşad Xose (Əliyev) 2010-cu ildə narkotik vasitələrin qanunsuz istifadəsi ittihamı ilə bir müddət həbs olunub.

Müğənni Maral Tahirqızı 2015-ci ildə Cinayət Məcəlləsinin 244-cü maddəsi (əxlaqsızlıq yuvası təşkil etmə və ya saxlama) ilə ittiham olunaraq 3 illik azadlıqdan məhrum edilmə cəzası alıb. Cəzanın üçdə ikisini çəkdiyi üçün vaxtından əvvəl sərbəst buraxılıb.

Prodüser Təranə Səmədova 2017-ci ildə qadın alverində ittiham olunaraq 2 il həbs cəzası alıb. 2019-cu ildə azadlığa çıxıb, lakin 2023-cü ilin fevralında hədə-qorxu ilə tələb etmə (CM-nin 182-ci maddəsi) ittihamı ilə yenidən həbs olunub və 6 il müddətinə azadlıqdan məhrum edilib. Globalinfo