Riyaddan sonra “Saudi Aramco” – Husilər hücumların miqyasını genişləndirdi
Yəmənin “Ənsar Allah” hərəkatı – husilər Səudiyyə Ərəbistanının şərqində “Saudi Aramco” şirkətinə məxsus neft-qaz obyektlərinə raket və pilotsuz uçuş aparatları ilə zərbələr endirdiklərini açıqlayıblar.
Hərəkatın hərbi nümayəndəsi Yəhya Səri bildirib ki, son 24 saat ərzində ballistik və qanadlı raketlər, eləcə də PUA-lardan istifadə edilməklə dörd genişmiqyaslı əməliyyat həyata keçirilib.
Onun sözlərinə görə, hücumların hədəfləri sırasında “Saudi Aramco”nun Şərq əyalətində yerləşən Shedgum qaz emalı zavodu və Tanajib enerji obyekti də olub.
Səri zərbələrdən sonra həmin obyektlərdə güclü yanğınların başladığını iddia edib. Bu məlumatın miqyası Səudiyyə Ərəbistanı tərəfindən ayrıca təsdiqlənməyib.
Husilər, həmçinin Ras əl-Ara və Əs-Suqya bölgələrində Səudiyyə qüvvələrinin mövqelərinə 6 ballistik raket və 2 PUA ilə hücum etdiklərini bildiriblər. Hərəkatın nümayəndəsi zərbələr nəticəsində onlarla insanın öldüyünü və yaralandığını iddia edib. İtkilərlə bağlı bu rəqəmlər də müstəqil şəkildə təsdiqlənməyib.
Bundan başqa, husilər oktyabrın 9-dan etibarən Riyaddakı Kral Xalid Beynəlxalq Hava Limanını bir neçə dəfə hədəfə aldıqlarını açıqlayıblar.
Regionda hücumların intensivləşməsi fonunda Səudiyyə Ərəbistanında hava limanları və enerji infrastrukturu ətrafında təhlükəsizlik tədbirləri gücləndirilib.
