Aİ-yə üzvlük prosesində yeni yanaşma: 4 ölkə üçün xüsusi "tələ" hazırlanır
Brüssel Avropa İttifaqına yeni üzvlərin qəbulunda vahid yanaşmadan imtina etməyi planlaşdırır. Politico Avropa Komissiyasındakı mənbələrə istinadən xəbər verir ki, ən perspektivli namizəd ölkələr üçün fərdi yol xəritələri hazırlanır.
Məlumata görə, fərdi yol xəritələri dörd ölkə — Ukrayna, Moldova, Monteneqro və Albaniya üçün hazırlanacaq. Hər bir sənəddə mərhələli hədəflər, konkret islahat tələblərinin siyahısı, eləcə də ayrı-ayrı tematik bloklar üzrə danışıqların başa çatdırılması üçün təxmini tarixlər göstəriləcək. Təşəbbüs müəllifləri hesab edirlər ki, bu yanaşma namizəd ölkələrdə aparılan daxili dəyişiklikləri danışıqlar prosesinin gedişi ilə əlaqələndirməyə imkan verəcək.
Yeni yanaşma namizəd ölkələrin iki kateqoriyaya — liderlərə və geridə qalanlara bölünməsini nəzərdə tutur. Gürcüstan, Türkiyə və Serbiya üçün fərdi planlar hazırlanmayacaq. Brüsseldə bu ölkələrdə demokratiya və hüququn aliliyi sahəsində geriləmə ehtimalını istisna etmirlər. Bununla belə, hətta dörd “qabaqcıl” namizəd üçün də proses ləng gedir və onların Aİ-yə üzvlük perspektivləri qeyri-müəyyən olaraq qalır.
Genişlənmə məsələsində kursun dəyişdirilməsi geosiyasi mülahizələrlə əlaqələndirilir. Avropa İttifaqında ehtiyat edirlər ki, inteqrasiya prosesinin uzanması namizəd ölkələrdə məyusluq yarada və rəqabət aparan digər təsir mərkəzlərinin güclənməsi üçün imkan aça bilər.
Aİ-nin genişlənmə siyasəti ilə bağlı ətraflı icmalın oktyabrın 6-da Avropa İttifaqı rəhbərliyinə təqdim olunması nəzərdə tutulur. İnteqrasiya strategiyası ilə bağlı məsələlər isə oktyabrın 15-də Brüsseldə keçiriləcək sammitin əsas mövzularından biri olacaq.
