İlham Əliyev: Azərbaycan dünyanın ən təhlükəsiz yerlərindən biridir
Qonşu ölkələrlə yaxşı və proqnozlaşdırıla bilən münasibətlər Azərbaycanın tranzit ölkə kimi inkişafının əsas şərtlərindən biri olub.
Prezident İlham Əliyev bu barədə Bakıda keçirilən II Azərbaycan Beynəlxalq İnvestisiya Forumunda çıxışı zamanı bildirib.
Dövlət başçısının sözlərinə görə, Azərbaycanın həm qonşuları, həm də qonşu ölkələrin qonşuları ilə yaxşı münasibətlər qurması vacib olub.
“Əks halda, açıq dənizə çıxışı olmayan ölkə kimi nə qədər çalışsaq da, uğur qazanmaq mümkün olmazdı”, – deyə Prezident bildirib. O əlavə edib ki, hazırda Azərbaycanın bütün qonşuları ilə münasibətləri aydın və, daha önəmlisi, proqnozlaşdırılandır.
İlham Əliyev tranzit imkanlarının genişləndirilməsi üçün Azərbaycanın dəmir və avtomobil yollarına, dəniz limanlarına və hava yükdaşımalarına böyük həcmdə sərmayə yatırdığını qeyd edib.
Prezidentin sözlərinə görə, ölkənin dəmir yollarının 60 faizi elektrikləşdirilib və bu proses davam etdirilir. Azərbaycan bütün qonşu ölkələrlə dəmir yolu əlaqəsinə, eyni zamanda inkişaf etmiş daxili nəqliyyat şəbəkəsinə malikdir.
Dövlət başçısı bildirib ki, Azərbaycan yükdaşıyan şirkətlərin ölkə ərazisindən keçən marşrutlara üstünlük verməsi üçün əvvəlcədən həm fiziki infrastruktur, həm də multimodal daşımalar üçün zəruri inzibati şərait yaradıb.
İlham Əliyev bu işlərin hazırkı geosiyasi dəyişikliklərdən əvvəl başladığını vurğulayaraq, beş il əvvəl ənənəvi təchizat zəncirlərinin bu dərəcədə pozula biləcəyini təsəvvür etməyin çətin olduğunu bildirib.
Prezident təhlükəsizlik məsələsinə də toxunub.
“Azərbaycan dünyanın ən təhlükəsiz yerlərindən biridir. Cinayətkarlıqla bağlı vəziyyət tam nəzarət altındadır”, – deyə İlham Əliyev bildirib. Bu, dövlət başçısının forumdakı qiymətləndirməsidir.
