Bu məşhur vərdiş saç tökülməsinə səbəb ola bilər - FOTO
Qulaqüstü qulaqlıqlardan uzun müddət istifadə saçların mexaniki dartılması nəticəsində yaranan traksion alopesiya, yəni saç tökülməsi riskini artıra bilər.
Bu barədə “Gazeta.Ru”ya dermatoveneroloq-kosmetoloq Aygül Samatova bildirib.
Həkimin sözlərinə görə, xüsusilə ağır, başı sıxan qulaqlıqlardan gündə 10 saata yaxın fasiləsiz istifadə baş dərisinin eyni nahiyəsinə davamlı təzyiq göstərə bilər.
“Nəzəri olaraq traksion alopesiya riski mövcuddur. Bu, illərlə sıx Afrika hörükləri və ya hündür, bərk yığılmış at quyruğu saç düzümü istifadə edən qadınlarda müşahidə edilən mexanizmlə eynidir. Qulaqlıq ağırdırsa və başı sıxırsa, onun qövsü baş dərisinin eyni hissəsinə təzyiq göstərə bilər. Bu zaman həmin nahiyədə qan dövranı zəifləyir, saç daha az qidalanır, nazikləşir və nəticədə tökülür. Lakin bu, lokal xarakter daşıyır — seyrəkləşmə bütün başda deyil, yalnız təzyiq olan hissədə yaranır”, – Samatova bildirib.
Mütəxəssis əlavə edib ki, iri qulaqüstü qulaqlıqların altında isti və nəm mühit yaranır, baş dərisi tərləyir və sebum ifrazı artır.
Baş dərisinin gigiyenasına düzgün əməl edilmədikdə isə belə mühitdə bakteriyalar çoxala və follikulit – saç follikullarının iltihabı yarana bilər. Bu vəziyyət də saçların sağlamlığına mənfi təsir göstərə bilər.
