“Şəkərsiz” yazısına aldanmayın: uşaqların dişlərini nə təhlükəyə atır?
Uşaqların gün ərzində tez-tez meyvə şirəsi, meyvə püresi və şirin qəlyanaltılar qəbul etməsi kariyes riskini artıra bilər. Uşaq stomatoloqu Amina Vısotenko “Gazeta.Ru”ya bildirib ki, burada əsas məsələ təkcə şəkərin miqdarı deyil, uşağın şirin məhsulları nə qədər tez-tez qəbul etməsidir.
Həkimin sözlərinə görə, yeməkdən sonra dişlərin üzərində qalan ərpdəki bakteriyalar şəkəri parçalayaraq turşular əmələ gətirir və diş minasının mineral itirməsinə səbəb olur. Tüpürcək zamanla ağızdakı turş mühiti neytrallaşdırsa da, uşaq yenidən şirə və ya başqa şirin məhsul qəbul etdikdə proses təkrar başlayır.
Vısotenko qeyd edib ki, qablaşdırmanın üzərində “əlavə şəkərsiz” yazılması məhsulda ümumiyyətlə şəkər olmadığı anlamına gəlmir. Meyvənin tərkibində təbii şəkildə olan fruktoza və qlükoza şirə və püredə də qalır. Xüsusilə uşağın şirəni və ya püredən hazırlanmış paketi uzun müddət ərzində az-az qəbul etməsi dişlərin şəkər və turş mühitlə təmasını uzadır.
Eyni məqam “sağlam” və ya “təbii” kimi təqdim olunan batonlara da aiddir. Belə məhsullarda xurma, quru meyvə, meyvə pastası, bal və müxtəlif şərbətlər hesabına kifayət qədər şəkər ola bilər. Stomatoloq meyvələri uşağın rasionundan çıxarmağa ehtiyac olmadığını, əsas yeməklər arasında isə içki kimi suya üstünlük verilməsinin daha məqsədəuyğun olduğunu vurğulayıb.
