Bu giləmeyvə dərinin qoruyucu baryerini gücləndirə bilər
Qaragilə ekstraktı dərinin qocalma əlamətlərini zəiflədə bilər. Alimlərin siçovullar üzərində apardığı araşdırma göstərib ki, qaragilə ekstraktı toxumalara zərər verən qlikasiyanın son məhsullarının (AGE) yığılmasını azalda və dərinin qoruyucu baryerinin vəziyyətini yaxşılaşdıra bilər.
Araşdırma zamanı siçovullar 16 ay ərzində yüksək miqdarda AGE tərkibli qidalarla bəslənib. Bu birləşmələr xüsusilə qidaların yüksək temperaturda bişirilməsi zamanı çox miqdarda əmələ gəlir.
Heyvanların bir qrupuna isə hər gün antosianlarla zəngin Avropa qaragiləsi ekstraktı verilib.
Nəticələr göstərib ki, AGE-lərlə zəngin qidalanma dərinin qocalma əlamətlərini sürətləndirib. Siçovulların qanında və dərisində qlikasiya məhsullarının miqdarı artıb, epidermis və buynuz təbəqə nazikləşib, hüceyrə qocalması ilə bağlı göstəricilər isə yüksəlib.
Qaragilə ekstraktı bu dəyişikliklərin bir hissəsinin qarşısını alıb. Ekstrakt qəbul edən heyvanlarda AGE-lərin yığılması daha az olub, dərinin strukturu daha yaxşı qorunub və hüceyrə qocalmasının əlamətləri daha zəif müşahidə edilib.
Bundan başqa, qaragilə ekstraktı dəridə yağ mübadiləsində yaranan pozuntuları qismən bərpa edib. Xüsusilə dərinin qoruyucu baryerinin saxlanılması üçün vacib olan birləşmələrin səviyyəsində yaxşılaşma qeydə alınıb. Eyni zamanda iltihabla əlaqəli proseslərin aktivliyi də azalıb.
Tədqiqat müəlliflərinin fikrincə, qaragilədə olan antosianlar qlikasiya məhsullarının yığılmasının dəriyə mənfi təsirlərindən qorunmağa kömək edə bilər.
