Qorxu və ağır xatirələr keçmirsə... - FOTO
Travmatik hadisədən sonra yaranan gərginliyin öhdəsindən gəlməyə dartınma hərəkətləri, fiziki aktivlik və nəfəs məşqləri kömək edə bilər. Bu barədə NEWS.ru-ya böhran, idman və onkopsixoloq, psixosomatika üzrə mütəxəssis Olqa Sofyanova bildirib.
Onun sözlərinə görə, travmatik hadisəni xatırladan məqamlardan tamamilə qaçmağa çalışmaq düzgün deyil. Eyni zamanda, insan özünü zorla həmin xatirələrə qaytarmağa da məcbur etməməlidir.
Sofyanova qeyd edib ki, belə vəziyyətlərdə bədənlə işləmək xüsusilə vacibdir. Nəfəs məşqləri, dartınma və fiziki aktivlik yığılmış gərginliyin azalmasına kömək edə bilər. Əgər qorxu və ya xatirələr insanın yaşamasına, işləməsinə, yatmasına və ünsiyyət qurmasına mane olursa, bu, mütəxəssisə müraciət etmək üçün siqnaldır.
Psixoloqun sözlərinə görə, travmatik təcrübədən sonra insan bir neçə mərhələdən keçə bilər: şok və inkar, qəzəb və qorxu, apatiya və depressiya, daha sonra isə qəbul və inteqrasiya. O vurğulayıb ki, bu mərhələlər hər zaman ardıcıl şəkildə baş vermir.
Sofyanova bildirib ki, insan hisslərini yaşamağa imkan vermədikdə və ya ətrafından kifayət qədər dəstək almadıqda müəyyən mərhələdə ilişib qala bilər. Onun sözlərinə görə, emosiyaları boğmaq əvəzinə onları qəbul etmək, gündəlik yazmaq, yaşananlar barədə etibar edilən insanla və ya psixoloqla danışmaq faydalı ola bilər.
Mütəxəssis həmçinin tədricən gündəlik həyata qayıtmağı tövsiyə edib. Yuxu rejimi, müntəzəm qidalanma, gəzinti və sadə gündəlik işlərin bərpası insan üçün dayaq rolunu oynaya bilər.
