Avropanı çətin qış gözləyir? Enerji istehlakı azaldıla bilər
Avropa İttifaqı enerji sahəsində ciddi çağırışlarla üzləşib. Reuters-in məlumatına görə, Aİ-nin energetika üzrə komissarı Dan Yorgensen üzv ölkələrin energetika nazirlərinə məktub göndərərək onları qış mövsümünə hazırlaşmağa və enerji istehlakının azaldılması üçün mümkün tədbirləri nəzərdən keçirməyə çağırıb.
“Biz təchizat böhranı ilə əlaqəli qiymət böhranı ilə üz-üzəyik”, — Yorgensen məktubunda bildirib.
Gas Infrastructure Europe-un məlumatına görə, Aİ-də qaz anbarlarının doluluq səviyyəsi təxminən 70 faizdir. Bu göstərici ötən ilin eyni dövrü ilə müqayisədə 12 faiz bəndi aşağıdır.
Niderlandın TTF qaz habında qiymətlər artıq bir neçə həftədir ki, 1 MVt·saat üçün 70 avrodan yuxarı səviyyədə qalır və 2022-ci il enerji böhranı dövründəki həddə çatıb.
Dan Yorgensen mövcud vəziyyəti dünya mayeləşdirilmiş təbii qaz bazarında gərginlik və Hörmüz boğazının faktiki olaraq bağlanması ilə əlaqələndirib. Boğazdan əvvəllər dəniz yolu ilə daşınan neft və mayeləşdirilmiş təbii qaz tədarükünün təxminən beşdə biri keçirdi.
Bundan əlavə, isti və quraq keçən yay mövsümü də Avropanın enerji sisteminə əlavə yük yaradıb.
Təklif olunan tədbirlər sırasında ictimai binalarda temperaturun məhdudlaşdırılması, açıq havada isitmə sistemlərindən imtina, gecə saatlarında xarici işıqlandırmanın söndürülməsi, eləcə də əhalinin pik saatlarda elektrik enerjisinə qənaət etməyə təşviq olunması yer alır.
Məsələ 29 sentyabrda İrlandiyada keçiriləcək energetika nazirlərinin toplantısında müzakirə olunacaq.
