İranda hicabsız səhnəyə çıxan müğənniyə 74 şallaq cəzası verildi
İranın Qum vilayətinin Apellyasiya Məhkəməsi 29 yaşlı müğənni Parastu Əhmədi barəsində çıxarılan hökmü qüvvədə saxladı. Müğənni məcburi hicab olmadan səhnəyə çıxdığına görə 74 şallaq cəzasına məhkum edilib.
Yerli medianın məlumatına görə, məhkəmə Əhmədiyə həmçinin iki il müddətinə audiovizual və sənət fəaliyyəti ilə məşğul olmağı, eləcə də İranı tərk etməyi qadağan edib. Müdafiə tərəfi apellyasiya şikayətinin məhkəmə zalında dinləmə keçirilmədən rədd edildiyini bildirib.
Parastu Əhmədi sosial şəbəkə hesabında məhkəmənin qərarının yekun olduğunu açıqlayıb.
Müğənni 2024-cü ilin dekabrında tamaşaçısız keçirilən və internetdə yayımlanan konsertdə hicabsız və solo şəkildə çıxış etmişdi. Təxminən 27 dəqiqəlik konsertin videosu YouTube-da yayımlanmışdı və milyonlarla baxış toplamışdı.
