Tehranda mülki əhali silahlandırılır: Qadınlar da hərbi təlim keçir - FOTO

ABŞ və İsrailin hücumlarından sonra İranda mülki şəxslərin mümkün yeni qarşıdurmalara hazırlanması məqsədilə hərbi təlimlər davam etdirilir.

Denmedia.az Haberler.com-a istinadən xəbər verir ki, Tehranda yaradılmış xüsusi təlim məntəqələrində qadın və kişilərə uzun lüləli silahlardan istifadə, ilk yardım, müdafiə, hava hücumundan müdafiə və raket sistemləri haqqında təlimlər keçirilir.

Təlimlər hücumlardan sonra vətəndaşların ölkənin müdafiəsində könüllü iştirakını təmin etmək məqsədilə yaradılan “Can Feda” sistemində qeydiyyatdan keçmiş şəxslər üçün təşkil olunur. Sistemdə 30 milyondan çox insanın qeydiyyatdan keçdiyi iddia edilir.

Proqram çərçivəsində iştirakçılara silahlarla tanışlıqla yanaşı, ilk yardım və mümkün şəhər döyüşləri şəraitində davranış barədə də məlumat verilir. Təlimlərin həftənin 6 günü keçirildiyi, qadın və kişilərin proqramlara ayrı-ayrılıqda qatıldığı bildirilir. Qadınların həftədə üç gün, gündə 3 saat təlim keçdiyi qeyd olunur.

Təlim iştirakçılarından Bita Restegar mümkün hücum və ya işğal vəziyyətinə hazır olmaq üçün proqrama qatıldığını bildirib. Digər iştirakçılar Zehra Nikuyferd və Fatemeh Kasımi də ehtiyac yaranacağı təqdirdə ölkənin müdafiəsində iştirak etməyə hazır olduqlarını deyiblər.

Təlimlər Vaşinqtonla Tehran arasında gərginliyin davam etdiyi bir vaxtda keçirilir. ABŞ Prezidenti Donald Tramp oktyabrın 4-də İranla bağlı qərar vermək mərhələsində olduğunu və məsələnin “asan”, yaxud “çətin” yolla həll ediləcəyini bildirib.