ABŞ naziri süni intellekt şirkətlərinin rəhbərlərini manyaka bənzətdi
ABŞ-ın maliyyə naziri Skott Bessent süni intellekt texnologiyalarını inkişaf etdirən şirkətlərin rəhbərlərini öz məhsullarının yaratdığı təhlükələr barədə açıqlamalarına görə sərt tənqid edib.
Axios nəşrinin məlumatına görə, Bessent həmin rəhbərlərin davranışını özünün dayandırılmasını istəyən serial qatil obrazına bənzədib.
“Əgər danışdıqları təhlükələr həqiqətən mövcuddursa, süni intellekt şirkətlərinin rəhbərləri fəaliyyətlərini yavaşlatmalıdırlar. Bu, bir növ Hannibal Lekterə bənzəyir: ‘Yenidən kimisə öldürməmiş məni dayandırın’”, – deyə nazir bildirib.
Bessent qeyd edib ki, ABŞ sistemi ümumilikdə sağlam vəziyyətdədir və süni intellektlə bağlı fəlakətli ssenarinin reallaşması onun üçün gözlənilməz olardı. Bununla belə, o, istənilən inkişaf ssenarisinə hazır olmağın vacibliyini vurğulayıb.
Nazirin fikrincə, süni intellekt sahəsinin nümayəndələrinin konkret həll yolları təklif etmədən davamlı olaraq təhlükələrdən danışması məsuliyyətli rəhbərlik nümunəsi sayıla bilməz.
