Avropa ölkəsində miqrantların Aİ-dən deportasiyasının sürətləndirilməsi tələb olundu
Almaniyanın daxili işlər naziri Aleksander Dobrindt Avropa İttifaqından miqrantların geri qaytarılması prosesinin sürətləndirilməli olduğunu bildirib. O, bunu Münhendə Avropa ölkələrinin daxili işlər nazirlərinin görüşü ərəfəsində deyib. DPA-nın məlumatına görə, Dobrindt həmçinin böhran vəziyyətlərində və miqrantların geri qaytarılması prosesində Avropa Sərhəd və Sahil Mühafizəsi Agentliyinin — Frontex-in səlahiyyətlərinin əhəmiyyətli dərəcədə genişləndirilməsini təklif edib.
“Bizə miqrasiya böhranlarına reaksiya vermək üçün yeni Avropa mexanizmi lazımdır”, — deyə Dobrindt bildirib.
Nazirin fikrincə, Frontex-in mandatı fövqəladə hallar üçün də genişləndirilməlidir. O, buna nümunə kimi yay aylarında Şimali Afrikadakı İspaniyanın Seuta eksklavına çoxsaylı miqrantın gəlməsini göstərib. Dobrindt belə vəziyyətlər üçün Frontex-in ayrıca çevik müdaxilə qüvvəsinin yaradılmasını təklif edib.
Onun sözlərinə görə, Seutada yaşananlara bənzər hallarda miqrantların sürətlə geri qaytarılması mexanizmi işə salınmalıdır. Eyni zamanda, Aİ-nin xarici sərhədlərində yerləşən ölkələrə əlavə dəstək göstərilməli, Frontex-in çevik qüvvələri böhran vəziyyətində həmin ölkələrə 24 saat ərzində yardım göstərməyə hazır olmalıdır.
