Mənim üçün ən ağır və ən müqəddəs ünvan şəhid məzarlarıdır-Sumqayıtda anım günüdən REPORTAJ

Sumqayıt Şəhidlər Xiyabanında bir daha anladım ki, bəzi acılar zamanla keçmir. Çünki bəzi itkilər bir ailənin yox, bütöv bir xalqın yaddaşına həkk olunur.

Sumqayıt Şəhər İcra Hakimiyyətinin başçısı Zakir Fərəcov, Milli Məclisin deputatları, hüquq-mühafizə orqanlarının rəhbərləri, şəhid ailələrinin üzvləri, qazilər, hərbçilər və şəhər ictimaiyyətinin nümayəndələri ilə birlikdə şəhidlərimizin əziz xatirəsini ehtiramla yad etdik.

“Qalib Əsgər” abidəsi önünə qoyulan hər gül, ziyarət edilən hər məzar, oxunan hər dua bir həqiqəti xatırlatdı: bu Qələbənin arxasında şəhidlərimizin canı, anaların göz yaşı, ataların səssiz ağrısı və ailələrin illərdir daşıdığı həsrət dayanır.

Mənim üçün bu günün ən ağır və ən müqəddəs ünvanı şəhid məzarları ilə yanaşı, şəhid ailələridir. Çünki onlar övladını, həyat yoldaşını, atasını Vətənə verdi. Biz isə onların qarşısında yalnız baş əyə bilərik.

Saat 12:00-da bir dəqiqəlik sükut zamanı düşünürdüm: bəlkə də bir dəqiqəlik sükut onların ailələrinin illərdir yaşadığı səssizliyin yanında çox qısadır...

Şəhidlərimizin ruhu qarşısında baş əyirəm. Şəhid ailələrinin qarşısında isə sonsuz ehtiramla susuram.

Onların əmanəti olan Vətənə sahib çıxmaq, adlarını yaşatmaq və qəhrəmanlıqlarını gələcək nəsillərə çatdırmaq bizim borcumuzdur.

Allah bütün şəhidlərimizə rəhmət eləsin.

Şəhid ailələrinə səbir və möhkəm can sağlığı versin.

Qazilərimizə isə şəfa diləyirəm.

Vətən sağ olsun!