Yumurta sevənlər üçün sevindirici xəbər - FOTO
Loma Linda Universitetinin alimləri müəyyən ediblər ki, yumurtanın müntəzəm istehlakı yaşlı insanlarda Alzheimer xəstəliyi riskini azalda bilər.
Araşdırmanın nəticələri “The Journal of Nutrition” jurnalında dərc olunub.
Tədqiqat zamanı 65 yaşdan yuxarı təxminən 40 min nəfərin məlumatları araşdırılıb.
İştirakçılar orta hesabla 15 il müşahidə altında saxlanılıb.
Nəticələr göstərib ki, həftədə ən azı beş dəfə yumurta yeyən insanlarda Alzheimer xəstəliyinin yaranma riski yumurta yeməyənlərlə müqayisədə 27 faiz daha aşağı olub.
Araşdırmanın rəhbəri Coan Sabate bildirib:
Yumurtanın rasionda tam olmaması ilə müqayisədə, həftədə ən azı beş yumurta istehlakı Alzheimer riskini azaltmaqla əlaqələndirilir.
Araşdırmada hətta orta səviyyədə yumurta istehlakının da faydalı ola biləcəyi vurğulanıb.
Belə ki:
- ayda 1–3 dəfə yumurta yeyənlərdə risk 17 faiz,
- həftədə 2–4 dəfə yeyənlərdə isə təxminən 20 faiz daha aşağı olub.
Alimlər bunun səbəbini yumurtanın zəngin tərkibi ilə izah edirlər.
Yumurta yaddaş və sinir hüceyrələri arasındakı əlaqə üçün vacib olan xolin maddəsi ilə zəngindir.
Bundan başqa, tərkibində beyin toxumasında toplanan və koqnitiv funksiyaları dəstəkləyən lutein və zeaksantin də mövcuddur.
Yumurtada həmçinin omeqa-3 yağ turşuları və neyronların fəaliyyəti üçün vacib sayılan fosfolipidlər var.