Dünyaya optimist baxış depressiya və təşviş pozuntularının riskini azaldır. Bu barədə LIFE.ru-ya psixoterapevt İrina Kraşkina danışıb.
Mütəxəssisin sözlərinə görə, gələcəyə daha pozitiv baxan insanlar problemlərdən qaçmaq əvəzinə onları həll etməyə çalışır, daha tez-tez dəstək axtarır və mənfi düşüncələrdə ilişib qalmırlar.
“Onlarda depressiya, təşviş pozuntuları və intihar düşüncələri riski daha aşağı olur, subyektiv xoşbəxtlik və həyatdan məmnunluq səviyyəsi isə daha yüksəkdir”, — deyə həkim bildirib.
Kraşkina vurğulayıb ki, optimizm çətinlikləri inkar etmək demək deyil. Eyni zamanda, davamlı pessimizm həyat tərzinə də təsir göstərə bilər.
Onun sözlərinə görə, sabit pessimizm depressiya riskini artırır, müalicəyə riayət etmə səviyyəsini azaldır və daha az sağlam davranışlarla əlaqələndirilir. Bu, siqaret çəkmə, həddindən artıq yemə və fiziki passivliyin daha geniş yayılması ilə müşahidə oluna bilər.