Tibb işçilərini girov götürüb bıçaqla bir-birlərinə hücum etdilər - FOTO
Nevşehirdə yardım çağırışına gedən tibb işçiləri dava edən qardaşlar tərəfindən eyvanda kilidlənib.
Hadisə şəhərin 2000 Evlər məhəlləsində yerləşən Nursultan Nazarbayev küçəsində baş verib.
Məlumata görə, evdə yaşayan N.Ö.-nün təzyiqi yüksəldiyi üçün 112 Təcili Yardım Xidmətinə müraciət olunub.
Ünvana gələn həkimlər müdaxilə etdiyi zaman evdə olan E.Ö. və Y.Ö. adlı qardaşlar arasında mübahisə başlayıb.
Qısa müddət sonra mübahisə bıçaqlı davaya çevrilib.
Bu zaman qardaşlar tibb işçilərini eyvanda kilidləyərək orada saxlayıblar.
Çarəsiz qalan tibb əməkdaşları polisə müraciət ediblər.
Hadisə yerinə gələn polis əməkdaşlarının müdaxiləsi nəticəsində həkimlər xilas olunub, E.Ö. və Y.Ö. isə saxlanılıb.
Bildirilir ki, şübhəlilərin yaxınları xəstəxana yaxınlığında görüntü çəkməyə çalışan jurnalistlərə də hücum etməyə cəhd göstəriblər.
Hadisə ilə bağlı araşdırma aparılır.