ABŞ-ın Mayami şəhərində Dollar Tree mağazalar şəbəkəsinin obyektlərindən birində ölü qadın tapılıb, — bu barədə NBC6 telekanalı məlumat yayıb. Bildirilir ki, qadın gecəni mağazanın dondurucu kamerasında gizlənərək keçirib və həmin yerdə həyatını itirib.
Səhər saatlarında mağaza əməkdaşı 32 yaşlı Elen Masiell Qaray Sançesin cəsədini soyuducu kamerada aşkarlayıb. İstintaqın məlumatına görə, qadın axşam saatlarında mağaza hələ açıq olarkən ora daxil olub və heç bir alış-veriş etmədən binanın arxa hissəsində yerləşən dondurucu kamerada gizlənib.
Əməkdaş dərhal polisə xəbər verib. Hüquq-mühafizə orqanları araşdırmaya başlayıb və faciənin səbəblərini aydınlaşdırmaq üçün mərhumun yaxınları ilə söhbətlər aparır. Hazırda polis qadının psixi sağlamlıq problemlərinin ola biləcəyi ehtimalını da istisna etmir.