Milli Məclisin deputatı Zaur Şükürov və Sumqayıt Bələdiyyəsinin sədri Adil Xudadatov 17-ci mikrorayon ərazisində sakinlərlə görüş keçirərək onları narahat edən problemləri dinləyiblər.
Denmedia.az xəbər verir ki, görüş zamanı bələdiyyə sədri və millət vəkili vətəndaş qəbullarının və birbaşa ünsiyyətin əhəmiyyətini xüsusi vurğulayaraq bildiriblər ki, sakinlərin gündəlik problemlərinin yerində öyrənilməsi və operativ həlli əsas prioritetlərdəndir.
Sakinlərin müraciətləri əsasən su, işıq və qaz təminatı, yol infrastrukturunun vəziyyəti, nümunəvi məhəllələrin salınması, stansiya istiqamətində Sumqayıta gedən nəqliyyatla bağlı çətinliklər, işsizlik, maddi dəstək ehtiyacı, eləcə də sənədsiz torpaq və evlərin sənədləşdirilməsi ilə bağlı olub.
Millət vəkili Zaur Şükürovun vətəndaşlarla keçirilən növbəti görüşü səmimiliyi, açıq dialoqa əsaslanması və konkret problemlərə yönəlmiş müzakirələri ilə yadda qalıb. Görüş zamanı deputat sakinlərin təklif və şikayətlərini diqqətlə dinləyib, onları narahat edən sosial, məişət və infrastruktur məsələlərinə geniş şəkildə toxunub.
Zaur Şükürov çıxışı zamanı bildirib ki, vətəndaşlarla birbaşa ünsiyyət deputat fəaliyyətinin əsas və ayrılmaz hissəsidir. Onun sözlərinə görə, insanların gündəlik həyatında qarşılaşdığı çətinlikləri yerində dinləmək, problemin mahiyyətini dərindən anlamağa və daha effektiv həll yolları tapmağa imkan yaradır. Bu cür görüşlər həm ictimai nəzarətin güclənməsinə, həm də dövlət-vətəndaş münasibətlərinin möhkəmlənməsinə xidmət edir.
Görüşdə sakinlər əsasən kommunal xidmətlər, yol infrastrukturu, sosial təminat və digər aktual məsələlərlə bağlı fikirlərini səsləndiriblər. Millət vəkili qaldırılan hər bir məsələyə həssaslıqla yanaşaraq, onların müvafiq qurumlarla əlaqələndiriləcəyini və nəzarətdə saxlanılacağını vurğulayıb.
Zaur Şükürov belə görüşlərin davamlı keçirilməsinin vacibliyini qeyd edərək, vətəndaş məmnuniyyətinin təmin olunmasının dövlət siyasətinin əsas prioritetlərindən biri olduğunu bildirib. O, sakinlərin fəallığını yüksək qiymətləndirib və problemlərin həlli prosesində ictimai iştirakçılığın mühüm rol oynadığını xüsusi qeyd edib.
Qaldırılan məsələlərin bir qismi elə görüş zamanı öz həllini tapıb. Daha geniş araşdırma və icra tələb edən müraciətlər isə qeydiyyata alınaraq aidiyyəti qurum və şöbələrə yönləndirilib.
Sakinlər keçirilən qəbuldan məmnun qaldıqlarını bildirərək, bu cür görüşlərin mütəmadi təşkil olunmasının problemlərin həllinə ciddi töhfə verdiyini qeyd ediblər.
Görüş qarşılıqlı dialoq və konstruktiv müzakirə şəraitində keçib.